ਬੀਜਿੰਗ: ਚੀਨ ਵਿੱਚ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨੇ ਸ਼ੁੱਕਰਵਾਰ ਨੂੰ ਸੂਚਨਾ ਸਹਾਇਤਾ ਬਲ (ਆਈਐਸਐਫ) ਦੇ ਗਠਨ ਦਾ ਐਲਾਨ ਕੀਤਾ। ਇਹ ਫੋਰਸ ਚੀਨ ਦੀ ਫੌਜ – ਪੀਪਲਜ਼ ਲਿਬਰੇਸ਼ਨ ਆਰਮੀ (PLA) ਦੀ ਇੱਕ ਸ਼ਾਖਾ ਹੋਵੇਗੀ। ਸ਼ੀ ਜਿਨਪਿੰਗ ਨੇ ਕਿਹਾ ਹੈ ਕਿ ਇਹ ਫੋਰਸ ਪੀਐੱਲਏ ਦੀ ਰਣਨੀਤਕ ਸ਼ਾਖਾ ਹੋਵੇਗੀ ਅਤੇ ਇਹ ਦੁਨੀਆ ਦੀ ਸਭ ਤੋਂ ਵੱਡੀ ਫੌਜ ਦੇ ਥੰਮ੍ਹ ਵਜੋਂ ਕੰਮ ਕਰੇਗੀ।
ਜਿਨਪਿੰਗ ਚੀਨੀ ਫ਼ੌਜ ਦੇ ਸੁਪਰੀਮ ਕਮਾਂਡਰ
ਜ਼ਾਹਿਰ ਹੈ ਕਿ ਇਸ ਫੋਰਸ ਰਾਹੀਂ ਚੀਨ ਦੁਨੀਆ ਵਿਚ ਆਪਣੀ ਪ੍ਰਚਾਰ ਮੁਹਿੰਮ ਤੇਜ਼ ਕਰੇਗਾ ਅਤੇ ਇਹ ਫੋਰਸ ਉਸ ਦੇ ਪ੍ਰਚਾਰ ਯੁੱਧ ਵਿਚ ਵੱਡੀ ਭੂਮਿਕਾ ਨਿਭਾਏਗੀ। ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਕੋਲ ਚੀਨ ਦੇ ਕੇਂਦਰੀ ਮਿਲਟਰੀ ਕਮਿਸ਼ਨ ਦੇ ਮੁਖੀ ਦਾ ਅਹੁਦਾ ਵੀ ਹੈ। ਇਸ ਕਾਰਨ ਉਹ ਚੀਨੀ ਫ਼ੌਜ ਦੇ ਸੁਪਰੀਮ ਕਮਾਂਡਰ ਹਨ। ਸੱਤਾਧਾਰੀ ਕਮਿਊਨਿਸਟ ਪਾਰਟੀ ਦੇ ਇਕ ਫੈਸਲੇ ਤਹਿਤ ਇਹ ਨਵੀਂ ਫੋਰਸ ਬਣਾਈ ਗਈ ਹੈ। ਸ਼ੀ ਜਿਨਪਿੰਗ ਕੋਲ ਪਾਰਟੀ ਦੇ ਜਨਰਲ ਸਕੱਤਰ ਦਾ ਅਹੁਦਾ ਵੀ ਹੈ। ਇਸ ਅਰਥ ਵਿਚ, ਚੀਨ ਵਿਚ ਸੱਤਾ ਦੇ ਤਿੰਨੋਂ ਉੱਚ ਅਹੁਦੇ ਸ਼ੀ ਜਿਨਪਿੰਗ ਕੋਲ ਹਨ।
ਰਣਨੀਤਕ ਸਹਾਇਤਾ ਬਲ
ਆਈਐਸਐਫ ਦੇ ਜ਼ਰੀਏ ਚੀਨੀ ਫੌਜ ਆਪਣੇ ਉਦੇਸ਼ਾਂ ਨੂੰ ਪ੍ਰਾਪਤ ਕਰਨ ਲਈ ਮਾਹੌਲ ਤਿਆਰ ਕਰੇਗੀ ਅਤੇ ਫਿਰ ਲੋੜ ਅਨੁਸਾਰ ਕਾਰਵਾਈ ਕਰੇਗੀ। ਉਦੇਸ਼ਾਂ ਨੂੰ ਪ੍ਰਾਪਤ ਕਰਨ ਲਈ, ਇਹ ਨਵੀਂ ਫੋਰਸ ਰਣਨੀਤਕ ਸਹਾਇਤਾ ਫੋਰਸ (SSF) ਦੇ ਨਵੇਂ ਸੰਸਕਰਣ ਵਜੋਂ ਕੰਮ ਕਰੇਗੀ। SSF ਦਾ ਗਠਨ 2015 ਵਿੱਚ PLA ਦੇ ਇੱਕ ਵਿੰਗ ਵਜੋਂ ਕੀਤਾ ਗਿਆ ਸੀ। ਆਈਐਸਐਫ ਦੇ ਗਠਨ ਦਾ ਐਲਾਨ ਕਰਦੇ ਹੋਏ, ਸ਼ੀ ਜਿਨਪਿੰਗ ਨੇ ਫੋਰਸ ਦੇ ਕਮਾਂਡਰ ਨੂੰ ਇਸਦੇ ਪ੍ਰਤੀਕ ਵਾਲਾ ਝੰਡਾ ਸੌਂਪਿਆ।
ਇਸ ਮੌਕੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨੇ ਉਮੀਦ ਪ੍ਰਗਟਾਈ ਕਿ ਆਈਐਸਐਫ ਪੀਐਲਏ ਦੀ ਇੱਕ ਸ਼ਾਖਾ ਵਜੋਂ ਆਪਣੀਆਂ ਜ਼ਿੰਮੇਵਾਰੀਆਂ ਨੂੰ ਸ਼ਾਨਦਾਰ ਢੰਗ ਨਾਲ ਨਿਭਾਏਗਾ। ਜ਼ਿਕਰਯੋਗ ਹੈ ਕਿ ਚੀਨ ਵਿੱਚ ਪੀਐਲਏ ਸੱਤਾਧਾਰੀ ਕਮਿਊਨਿਸਟ ਪਾਰਟੀ ਦੇ ਨਿਰਦੇਸ਼ਾਂ ‘ਤੇ ਕੰਮ ਕਰਦੀ ਹੈ ਅਤੇ ਪਾਰਟੀ ਦੁਆਰਾ ਨਿਰਧਾਰਤ ਉਦੇਸ਼ਾਂ ਨੂੰ ਪੂਰਾ ਕਰਦੀ ਹੈ। ਸਿਪਾਹੀ ਕਮਿਊਨਿਸਟ ਪਾਰਟੀ ਪ੍ਰਤੀ ਵਫ਼ਾਦਾਰ ਰਹਿਣ ਦੀ ਸਹੁੰ ਵੀ ਲੈਂਦੇ ਹਨ।
