ਵਿਆਹ ਦੇ ਸੱਦੇ-ਪੱਤਰ ਰਾਹੀਂ ਮੱਤਭੇਦ ਦੁਰ ਕਰਨ ਬਾਦਲ ਪੁੱਜੇ ਜੇਪੀ ਨੱਢਾ

ਲੰਬੀ-ਭਾਜਪਾ ਦੇ ਕੌਮੀ ਪ੍ਰਧਾਨ ਜਗਤ ਪ੍ਰਕਾਸ਼ ਨੱਢਾ ਨੇ ਅੱਜ ਪਿੰਡ ਬਾਦਲ ਵਿਚ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨਾਲ ਮੁਲਾਕਾਤ ਕਰ ਕੇ ਉਨਾਂ ਨੂੰ ਆਪਣੇ ਵੱਡੇ ਪੁੱਤਰ ਦੇ ਵਿਆਹ ਦਾ ਸੱਦਾ ਪੱਤਰ ਦਿੱਤਾ। ਆਪਸੀ ਵਿਚਾਰਕ ਗੁੰਝਲਾਂ ਵਿਚੋਂ ਗੁਜ਼ਰ ਰਹੇ ਦੋਵੇਂ ਸਿਆਸੀ ਭਾਈਵਾਲਾਂ ਦੇ ਪ੍ਰਮੁੱਖ ਆਗੂਆਂ ਵਿਚਕਾਰ ਕੁਝ ਸਮਾਂ ਬੰਦ-ਕਮਰਾ ਮੀਟਿੰਗ ਵੀ ਹੋਈ। ਸੂਤਰਾਂ ਅਨੁਸਾਰ ਇਸ ਦੌਰਾਨ ਜੇ.ਪੀ. ਨੱਢਾ ਨੇ ਸ੍ਰੀ ਬਾਦਲ ਨਾਲ ਦੋਵਾਂ ਧਿਰਾਂ ਦਰਮਿਆਨ ਵਧ ਰਹੇ ਵਖਰੇਵਿਆਂ ਬਾਰੇ ਚਰਚਾ ਕੀਤੀ। ਸ੍ਰੀ ਨੱਢਾ ਦੀ ਆਮਦ ‘ਤੇ ਭਾਜਪਾ ਕਾਡਰ ਨੇ ਫੁੱਲਾਂ ਦੀ ਵਰਖਾ ਕੀਤੀ ਤੇ ਬਾਦਲਾਂ ਦੇ ਬੂਹੇ ‘ਤੇ ਭੰਗੜੇ ਵੀ ਪਾਏ। ਜ਼ਿਕਰਯੋਗ ਹੈ ਕਿ ਭਾਜਪਾ ਪਿਛਲੇ ਕੁਝ ਸਮੇਂ ਤੋਂ ਪੰਜਾਬ ‘ਚ ਉੱਚੀ ਉਡਾਰੀ ਭਰਨ ਦੇ ਰੌਂਅ ਵਿਚ ਹੈ ਪਰ ਦਿੱਲੀ ‘ਚ ਪਰ ਕੁਤਰੇ ਜਾਣ ਮਗਰੋਂ ਭਾਜਪਾ ਜ਼ਮੀਨ ‘ਤੇ ਆ ਗਈ ਹੈ। ਬੀਤੇ ਦਿਨੀਂ ਅਕਾਲੀ ਦਲ ਦੀ ਰੈਲੀ ਮੌਕੇ ਵੱਡੇ ਬਾਦਲ ਦੇ ਬਿਆਨ ਨੇ ਭਾਜਪਾ ਲੀਡਰਸ਼ਿਪ ਨੂੰ ਸੋਚਣ ਲਈ ਮਜਬੂਰ ਕੀਤਾ ਤੇ ਅੱਜ ਜੇਪੀ ਨੱਢਾ ਕਰੀਬ ਡੇਢ ਘੰਟਾ ਬਾਦਲਾਂ ਦੀ ਰਿਹਾਇਸ਼ ‘ਤੇ ਠਹਿਰੇ। ਦੋਵਾਂ ਆਗੂਆਂ ਨੇ ਦੁਪਹਿਰ ਦਾ ਖਾਣਾ ਵੀ ਖਾਧਾ। ਇਸ ਮੌਕੇ ਸ੍ਰੀ ਨੱਢਾ ਨੇ ਦੁਸ਼ਾਲੇ ਨਾਲ ਸ੍ਰੀ ਬਾਦਲ ਦਾ ਸਨਮਾਨ ਕੀਤਾ ਤੇ ਸ੍ਰੀ ਬਾਦਲ ਨੇ ਉਨਾਂ ਨੂੰ ਕਿਰਪਾਨ ਭੇਟ ਕਰ ਕੇ ਐੱਨਡੀਏ ਨੂੰ ਦਿਲੀ ਏਕੇ ਨਾਲ ਅਗਾਂਹ ਵਧਣ ਦਾ ਸੰਦੇਸ਼ ਦਿੱਤਾ। ਇਸ ਮੌਕੇ ਸ੍ਰੀ ਨੱਢਾ ਦੇ ਨਾਲ ਪਾਰਟੀ ਦੇ ਉਪ ਪ੍ਰਧਾਨ ਪ੍ਰਭਾਤ ਝਾਅ, ਸੂਬਾ ਭਾਜਪਾ ਪ੍ਰਧਾਨ ਅਸ਼ਵਨੀ ਸ਼ਰਮਾ, ਦਇਆ ਸਿੰਘ ਸੋਢੀ, ਪ੍ਰਵੀਣ ਬਾਂਸਲ ਆਦਿ ਹਾਜ਼ਰ ਸਨ। ਅਕਾਲੀ ਦਲ ਵੱਲੋਂ ਸਾਬਕਾ ਮੰਤਰੀ ਸਿਕੰਦਰ ਸਿੰਘ ਮਲੂਕਾ, ਅਵਤਾਰ ਸਿੰਘ ਬਨਵਾਲਾ, ਗੁਰਬਖਸ਼ੀਸ਼ ਸਿੰਘ ਮੌਜੂਦ ਸਨ। ਭਾਜਪਾ ਦੇ ਕੌਮੀ ਪ੍ਰਧਾਨ ਦੀ ਪਿੰਡ ਬਾਦਲ ਫੇਰੀ ਦੇ ਮੱਦੇਨਜ਼ਰ ਸ੍ਰੀ ਮੁਕਤਸਰ ਸਾਹਿਬ, ਫਾਜ਼ਿਲਕਾ, ਬਠਿੰਡਾ, ਫ਼ਰੀਦਕੋਟ ਜ਼ਿਲਿਆਂ ਤੋਂ ਕਈ ਬੱਸਾਂ ‘ਚ ਕਾਰਕੁਨ ਭਰ ਕੇ ਲਿਆਂਦੇ ਗਏ। ਭਾਜਪਾ ਕਾਰਕੁਨਾਂ ਨੇ ਜ਼ਿਲਾ ਪ੍ਰਧਾਨ ਰਾਜੇਸ਼ ਫੁਟੇਲਾ ਦੀ ਅਗਵਾਈ ਹੇਠ ਜੇਤੂ ਨਾਅਰੇ ਲਗਾਏ। ਪਿੰਡ ਬਾਦਲ ਦੀ ਹੱਦ ‘ਤੇ ਸਾਬਕਾ ਜ਼ਿਲਾ ਪ੍ਰਧਾਨ ਰਾਕੇਸ਼ ਧੀਂਗੜਾ ਦੀ ਅਗਵਾਈ ‘ਚ ਪਾਰਟੀ ਕਾਡਰ ਨੇ ਸ੍ਰੀ ਨੱਢਾ ਦਾ ਸਵਾਗਤ ਕੀਤਾ। ਪ੍ਰਕਾਸ਼ ਸਿੰਘ ਬਾਦਲ ਨਾਲ ਮੁਲਾਕਾਤ ਮਗਰੋਂ ਜਗਤ ਪ੍ਰਕਾਸ਼ ਨੱਢਾ ਨੇ ਆਖਿਆ ਕਿ ਭਾਜਪਾ ਤੇ ਅਕਾਲੀ ਦਲ ਦਾ ਰਿਸ਼ਤਾ ਬਹੁਤ ਪੁਰਾਣਾ ਹੈ ਤੇ ਸ੍ਰੀ ਬਾਦਲ ਦਾ ਐੱਨ.ਡੀ.ਏ ਵਿਚ ਬੇਹੱਦ ਸਤਿਕਾਰ ਹੈ ਅਤੇ ਸਾਰੇ ਚਾਹੁੰਦੇ ਹਨ ਕਿ ਉਨਾਂ ਦੀ ਅਗਵਾਈ ਹੇਠ ਐਨ.ਡੀ.ਏ. ਅਗਾਂਹ ਵਧੇ। ਇਸ ਤੋਂ ਪਹਿਲਾਂ ਬਠਿੰਡਾ ਹਵਾਈ ਅੱਡੇ ‘ਤੇ ਉਨਾਂ ਦਾ ਸਵਾਗਤ ਕੀਤਾ ਗਿਆ। ਅੰਮਿ੍ਰਤਸਰ (ਜਗਤਾਰ ਸਿੰਘ ਲਾਂਬਾ): ਭਾਜਪਾ ਦੇ ਕੌਮੀ ਪ੍ਰਧਾਨ ਜੇ.ਪੀ. ਨੱਢਾ ਨੇ ਅੱਜ ਸ਼ਾਮ ਇੱਥੇ ਸ੍ਰੀ ਹਰਿਮੰਦਰ ਸਾਹਿਬ ਮੱਥਾ ਟੇਕਿਆ ਅਤੇ ਸਰਬੱਤ ਦੇ ਭਲੇ ਦੀ ਅਰਦਾਸ ਕੀਤੀ। ਭਾਜਪਾ ਦੇ ਕੌਮੀ ਪ੍ਰਧਾਨ ਬਣਨ ਮਗਰੋਂ ਉਹ ਪਹਿਲੀ ਵਾਰ ਇੱਥੇ ਆਏ ਹਨ। ਇਸ ਮੌਕੇ ਉਨਾਂ ਨੇ ਅਕਾਲੀ-ਭਾਜਪਾ ਗੱਠਜੋੜ ਕਾਇਮ ਰਹਿਣ ਦਾ ਦਾਅਵਾ ਕੀਤਾ। ਉਨਾਂ ਆਖਿਆ ਕਿ ਭਾਜਪਾ ਨਾਲ ਸ਼੍ਰੋਮਣੀ ਅਕਾਲੀ ਦਲ ਦੀ ਸਾਂਝ ਬਹੁਤ ਮਜ਼ਬੂਤ ਹੈ ਅਤੇ ਇਸ ਨੂੰ ਅਗਾਂਹ ਵੀ ਕਾਇਮ ਰੱਖਣ ਲਈ ਦੋਵੇਂ ਧਿਰਾਂ ਵਚਨਬੱਧ ਹਨ। ਉਨਾਂ ਦੱਸਿਆ ਕਿ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਮਿਲੇ ਹਨ ਅਤੇ ਉਨਾਂ ਵੀ ਗੱਠਜੋੜ ਨੂੰ ਬਣਾਏ ਰੱਖਣ ਦੀ ਭਾਵਨਾ ਪ੍ਰਗਟਾਈ ਹੈ। ਸੂਚਨਾ ਕੇਂਦਰ ਵਿਚ ਉਨਾਂ ਨੂੰ ਸ਼੍ਰੋਮਣੀ ਕਮੇਟੀ ਦੇ ਸੀਨੀਅਰ ਮੀਤ ਪ੍ਰਧਾਨ ਭਾਈ ਰਾਜਿੰਦਰ ਸਿੰਘ ਮਹਿਤਾ ਨੇ ਸਨਮਾਨਿਤ ਕੀਤਾ। ਉਨਾਂ ਦੁਰਗਿਆਣਾ ਮੰਦਰ ਵੀ ਮੱਥਾ ਟੇਕਿਆ।